- Í 2025 kunnu vit framleiða 2,7 milliónir tons av laksi og sílum. Harvið kunnu vit nøkta tørvin hjá 100 milliónum menniskjum á fiskavørum og samstundis skapa 56.000 nýggja arbeiðspláss, sigur Fredd Wilsgaard, varaleiðari í norska havbúnaðarfelagnum.
Á fundi í Norðulendska Ráðharraráðnum fyrr í summar legði norska havbúnaðarfelagið, FHL, fram frágreiðing um, hvussu alivinnan í Noregi kann økja um sína framleiðslu. Útgangsstøðið er, at Noreg skal gerast heimsins fremsta land innan framleiðslu av mati úr havinum í 2025.
- Vit mugu seta okkum greið mál. Heimsheilsustovnurin hjá ST mælir fólki til at eta meira fisk til frama fyri fólkaheilsuna. Samstundis er ikki nóg mikið at fiskavørum til tað støðugt vaksandi fólkatalið í heiminum. Tí vilja vit hyggja eftir, hvussu vit í Noregi kunnu økja okkara framleiðslu, sigur Fredd Wilsgaard.
Frágreiðingin “Sjømat 2025” varð løgd fram í Tróndheimi í juni, har FHL hevði bjóðað politikarum, almennum stovnum, granskarum og umhvørvisfelagsskapum til at kjakast um, hvussu norska alivinnan ítøkiliga kann økja framleiðsluna.
Hetta krevur tó, at vinnan og myndugleikar í samráð styrkja gransking innan aling og menning av tøkni. Harumframt er neyðugt at skipa umhvørvisátøk og tryggja at økta framleiðslan fer fram eftir burðardyggum leisti.
Um framleiðslan í Noregi skal økjast er eisini neyðugt at leggja eina ætlan fyri, hvussu økið framvið norsku strondini kann nýtast til at økja framleiðsluna. FHL metir, at økið kann gagnnýtast á betri hátt, soleiðis at framleiðslan kann økjast.
