Ferðavinnustevnan 2025 verður hildin á Hotel Hilton fríggjadagin 7. november, og nú ber til at melda seg til bæði ráðstevnuna og veitsluna.
Ráðstevnan byrjar við skráseting kl. 15.30 og heldur fram til kl. 18.10. Veitsluhaldið byrjar beinanvegin kl. 18.10, tá ið Beinta Haraldsen diskar, og brellbitar eru at fáa.
Borðhaldið byrjar klokkan 19, og har verða millum annað ársins heiðursbrøv handað. Heiðursbrøvini verða latin í tveimum bólkum:
- Ársins ferðavinnufólk
- Ársins átak
Spennandi framløgur
Skráin fyri ráðstevnuna inniheldur trý spennandi innsløg við Julie Lindegaard, Sóley Heradóttir Hammer og Eydnu Skaale.
Julie hevur drúgvar royndir í filmsferðavinnuni, og hon fer at leggja fram undir heitinum “I filmens fodspor – erfaringar og faldgruber i arbejdet med filmturisme”.
Sóley er leiðari í Hugskotinum, og hon fer at tosa um samstarv og nýskapan, sum menna ferðavinnuna.
Eydna, retorikari, fer at greiða frá, hvønn týdning retorikkur hevur, og hvussu tað ber til at røkka einum góðum sambandi millum veitara og gestir í ferðavinnuhøpi.
Luttøkukostnaður og tilmeldingarfreist
Kostnaðurin fyri at luttaka á Ferðavinnustevnuni 2025 er ymiskur, alt eftir um tú ert limur í Ferðavinnufelagnum ella ikki.
Luttøkukostnaður:
Limir í Ferðavinnufelagnum:
- Kr. 595,- fyri hvønn luttakara um dagin
- Kr. 995,- fyri luttøku um dagin og kvøldið
Luttakarar, sum ikki eru limir í Ferðavinnufelagnum:
- Kr. 995,- fyri hvønn luttakara um dagin
- Kr. 1.995,- fyri luttøku um dagin og kvøldið
Ferðavinnustevnan er fyri øll, sum virka í ferðavinnuni.
Tilmeldingarfreistin er mikudagin 5. november 2025.
Hvør skal vinna heiðursbrøvini?
Heiðursbrøv verða latin til tess at heiðra fólkum og átøkum, sum gera mun í føroysku ferðavinnuni.
Ársins ferðavinnufólk verður handað teimum, ið gera eitt stórt og týdningarmikið arbeiði í gerandisdegnum, og sum ferðavinnan ikki kundi verið fyriuttan.
Ársins átak verður latið teimum, ið hava dirvi og hugflog til at bróta upp úr nýggjum og gera hugskot til veruleika. Tað kann vera einstaklingar, virkir, stovnar ella felagsskapir, sum í farna árinum hava gjørt okkurt nýhugsandi, ið styrkir og mennir føroysku ferðavinnuna.
Send tína tilnevning inn:
Tilnevningar kunnu sendast við stuttari grundgeving til industry@industry.fo í seinasta lagi mánadagin 20. oktober 2025.
Dómsnevndin er mannað av Henny á Líknargøtu, Guðrið Højgaard og Anniku Lisberg.
Á Ferðavinnustevnuni í fjør fingu Svein í Heiðunum, Caféin á Mølini og Mimmy Vágsheyg handað heiðursbrøv.
