Løntakarar hava rætt til frítíð og frítíðarløn sambært Ll. nr. 30 frá 7/4-1986 við seinni broytingum.

Frítíðin er 30 dagar (leygardagur er íroknaður hesar 30 døgunum) fyri fulla starvstíð í tíðarskeiðnum 1. apríl til 31. mars, sum er innvinningarárið. Hetta svarar til 5 vikur. Innvinningarárið er tað árið, sum løntakari vinnur rættin til at halda frí. Arbeiðir løntakarin styttri enn fult innvinningarár, verður frítíðin sett í mun til arbeiðstíðina, tvs. at fyri hvønn mánað, sum arbeitt verður, vinnur løntakarin 2,5 dagar um mánaðin. Legg til merkis, at aftur her er leygardagurin íroknaður. Um leygardagurin ikki verður taldur við, vinnur løntakarin 2,08 dagar um mánaðin.

Løntakari, sum ikki hevur vunnið sær rætt til frítíð við løn ella frítíðarløn, hevur tó rætt til at taka frí uttan løn í upp til 30 dagar, heruppií leygardagar, í einum frítíðarári.

Sambært lógini skal frítíðin verða hildin í tíðarskeiðnum 2. mai til 1. mai (frítíðarárið). Minst 4 vikur av frítíðini skulu gevast samanhangandi í tíðini frá 2. mai til 30. september (frítíðarskeiðið). Restin skal verða hildin í seinasta lagi 1. mai.  

Arbeiðsgevarin ásetir í samráð við løntakaran, nær frítíðin skal takast og boðar honum frá hesum við rímiligari freist. Tað er arbeiðsgevarin, sum endaliga avger, nær frítíðin skal haldast.

Mánaðarløntir løntakarar hava rætt til frítíð við løn og frítíðarískoytið, ið er 1,5% av vunnari løn í undanfarna innvinningarári. Av yvirtíð verður goldið frítíðarískoytið á 1,5%, um ikki annað er ásett í sáttmála. Tímalønt fáa frítíðarløn, ið er 12% av vunnari løn.

Við útrokning av frítíðarløn og frítíðarískoyti telja allar skattskyldugar lønarveitingar við, tó ikki løn, sum er útgoldin í frítíðini, veitt frítíðarløn ella útgoldið frítíðarískoytið.