”Gransking og menning er sera týdningarmikið fyri menning av fiski- og alivinnuni. Tann vøkstur og menning, sum hevur verið seinnu árini, hevði ikki verið møguligur uttan granskarar og granskingarumhvørvini, sum eru í Noregi. Kunnleiki og evnini at gagnnýta gransking hava givið sera góð úrslit. Soleiðis verður tað eisini í framtíðini”, sigur norski fiskimálaráðharrin. Víðari sigur hon,”at tilgongdin til vitan á høgum støði er lyklafaktorurin fyri at styrkja kappingarevnini hjá vinnuni innan burðardyggar karmar. Við nýggju granskingarætlanini heldur hetta týdningarmikla arbeiðið fram”.

Granskingarætlanin peikar á fylgjandi høvuðsøkir:

- Gransking, sum tryggjar burðardygga gagnnýtslu av tilfeinginum

- Tørvurin á tryggum og góðum mati til eitt vaksandi fólkatal

- Gransking innan sjóflutning, sjótrygd og oljutilbúgving

- Gransking, sum tryggjar at vit skilja og tilrættalegging til klimabroytingar

- Harumframt gransking, rætta ímóti nýggjum økjum, sum kunnu geva grundarlag fyri nýggjum arbeiðsplássum til framtíðina.

Norskir granskarar eru fremst í heiminum innan fleiri økir innan marina gransking. Somuleiðis er marin gransking altjóðagjørd í stóran mun, og samstarv við onnur lond gerst alsamt meira týdningarmikið fyri at fáa neyðugu vitanina fram.

Stóri tørvurin fyri vitan um, hvussu fiski- og alivinnan skal umsitast. Hetta ger tað nátturligt, at tað almenna fíggjar stóran part av marinu granskingini í Noregi. Í hesum árinum játtar norska stjórnin eina milliard kr. til gransking og menning innan fiski- og alivinnu umvegis fíggjarlógina. Seinastu fimm árini er játtanin økt við 17 % (kelda: www.kyst.no).

”Enn eiga føroyingar eina miðvísa granskingarætlan innan fiski- og alivinnu til góðar”, sigur Marita Rasmussen, stjóri í Vinnuhúsinum.