Tað er Norrønt Atlantssamstarv, NORA, sum eigur og rekur hesa síðuna, har ætlanin er at veita dagførdan kunnleika um búskap og politikk í NORA-londunum. NORA-londini eru Føroyar, Grønland, Ísland og Strandanoreg.

Á heimasíðuni, sum er á enskum, verður dagliga løgd út nýggj kunning um búskaparliga og politiska virksemið í økinum. Umframt dagligu kunningina, hevur heimasíðan nýggjastu marknaðartølini fyri týdningarmestu rávørurnar í økinum, so sum olju, gass, jarn, aluminium, laks, tosk o.a. Triði høvuðsparturin á nýggju heimasíðuni eru búskaparhagtøl og ávísar frá teimum fýra londunum, ið lýsa búskaparvøkstur, uttanríkishandil, arbeiðsmarknað og nýtslu.

Ætlanin við www.noraregiontrends.org er at veita altjóða samfelagnum, vinnulívi, politikarum, embætisfólki og áhugaðum annars eina heimasíðu, ið savnar tíðindi, upplýsing og vinnupolitiska kunning á enskum máli úr tí parti av Norðurlondum, sum hava strond móti arktisku havleiðunum. Heimasíðan fer at fevna um fýra búskapargeirar: orku, mineral, havtilfeingi og ferðavinnu - við dagførdum tíðindum, hagtølum og marknaðardáta.