Mouritz Mohr heldur fram sum formaður í Sjóvinnufelagnum, meðan Hanus Mikkelsen er nýggjur í nevndini

Mánadagin 31. mars var aðalfundur í Sjóvinnufelagnum. Á aðalfundinum stóðu Mouritz Mohr, Eli Lassen og Julian Johansen fyri vali. Áðrenn fundin boðaði Eli Lassen frá, at hann ikki vildi verða valdur aftur í nevndina.

Mouritz Mohr og Julian Johansen vóru báðir valdir aftur í nevndina, og fyri Eli Lassen er Hanus Mikkelsen valdur í nevndina. Hartil er Frimodt Rasmussen afturvaldur sum tiltakslimur.

Eftir fundin skipaði nevndin seg við Mouritzi Mohr sum formanni og Juliani Johansen sum næstformanni.

Nevndin í Sjóvinnufelagnum sær tí soleiðis út:

• Mouritz Mohr, formaður
• Julian Johansen, næstformaður
• Alina Jespersen, nevndarlimur
• Christian Danielsen, nevndarlimur
• Hanus Mikkelsen, nevndarlimur
• Frimodt Rasmussen, tiltakslimur

Stutt um Sjóvinnufelagið
Endamálið við felagnum er at savna allar fyritøkur, sum selja vørur og tænastur til vinnu á sjóøki nærhendis Føroyum umframt Arktis. Føroyar eru nýmótans samfelag mitt í Norðuratlantshavi við góðum samskiftis-, ferða- og flutningssambandi til evropeiska meginlandið.

Føroyar eru tí kappingarførar við okkara nærmastu grannar, tá ið tað snýr seg um at veita alskyns tænastur til sjóvinnuna um okkara leiðir. Í dag eru 25 limafyritøkur í Sjóvinnufelagnum.

Les meira um felagið her.