Í farnu viku legði VisitFaroeIslands fram ætlan fyri føroyska ferðavinnu. Eyðkennið við eftirmælinum av degnum er, at fólkið fegnast, vinnan fegnast og politiska skipanin fegnast. So er bara eftir at bróta upp um armar. Og høvi er til tað, nú Ferðaráð Føroyar hevur fingið karmar at virka undir og eina skipan kring seg, sum virkar stimbrandi fyri fyritakssemið í ráðnum.

Altumráðandi er nú, at ferðavinnan tekur ímóti og tekur støðið í marknaðarføringstilfarinum, sum nú er gjørt. Somuleiðis at politiska skipanin gevur Ferðaráðnum og ferðavinnuni høvi til at útføra tær ætlanir, sum nú eru lagdar fyri dagin og byggja uppá hesar soleiðis, at ferðavinna í Føroyum gerst eitt enn størri íkast til føroyska búkapin.

Seinastu árini hava vit sæð fleiri føroyskar fyritøkur spretta og aðrar blóma, og eru ferðavinnutilboð ment, sum vit fyrr bert hava droymt um. Hetta er sera gott fyri ferðavinnuna og somuleiðis sera gott fyri okkum, sum búgva í Føroyum. Tilboðini, sum ferðavinnan veitir til ferðafólk, sum koma hendavegin, eru tilboð, sum gera tað liviligari í Føroyum – fyri einstaklingin og føroysku vinnuna sum heild.

Føroya Arbeiðsgevarafelag ynskir Ferðaráð Føroya og okkum øllum hjartaliga tillukku og blíðan byrð.