NORA, sum arbeiðir við at fremja samstarv og menning í Føroyum, Grønlandi, Íslandi og Strandanoregi, hevur latið OECD ( Organisation for Economic Developement) gera eina økisgreining av NORA-regiónini. Frágreiðingin var løgd fram seinastu viku í Keypmannahavn.

Frágreiðingin vísir á avbjóðingar og møguleikar, sum liggja í NORA- økinum.

Størsta einstaka avbjóðingin fyri øki sum heild er, at tað líðir undir fólkaflyting og sokallaðum  “braindrain” . Fólki flytur frá útjaðaranum til størri býir nærhendis  ella í grannalondunum.

Men ikki er at falla í fátt. OECD greiningin vísir á fleiri áhugaverdar vegir at fara, fyri at tryggja fleirtáttan av búskapunum í NORA økinum, og á hendan hátt at halda uppá íbúgvarnar í økinum og fáa fleiri at búseta seg her.  Av økjum, sum OECD heldur eru skilagóð at leggja seg eftir, er útbygging av infrastrukturinum innan og millum økini í regiónini, menning av ferðavinnuni, størri gagnnýtsla av kunningartøkni, burðardygg umsiting av náttúrutilfeinginum, gransking og menning innan økir har vit hava vinnuligir og mentanarligir fyrimunir, samstarv millum økini fyri at gagnnýta avmarkaðu fíggjarligu orkuna, sum økini hvør í sínum lagi hava og so framvegis.

Frágreiðingin  greinar eisini NORA-regiónina hagtalsliga og gevur tískil grundleggjandi fortreytir fyri einum hollum kjaki og seinni støðutakan til konkret átøk, sum kunnu gerast øllum økinum at frama. Somuleiðis gevur frágreiðingin okkum vitan um, hvussu Føroyar standa seg innan ymisk økir í mun til restina av NORA-økinum.

Alt í alt eitt amboð til okkara at brúka komandi tíðirnar til at taka støður, sum kunnu betra um okkara kappingarføri um virðismiklasta tilfeingi - nevniliga fólkatilfeingi.