Týsdagin 7. juni hevði Oljuvinnufelagið ársaðalfund.
Fyri valið stóðu Magni Arge og Jostein Petersen, og teir tóku báðir við afturvali og vóru valdir. Í nevndini sita sostatt Magni Arge, Gunnbjørn Joensen, Anja Jacobsen, Eli Lassen og Jostein Petersen. Christian Danielsen varð afturvaldur sum tiltakslimur.
Marknaðarføra føroyskar veitarar
Á aðalfundinum greiddi formaðurin frá, at Oljuvinnufelagið seinasta árið hevur arbeitt við at staðseta Føroyar sum ein maritiman tænastudepil fyri frálandavinnuna og fyri alla skipaferðslu, sum siglir framvið Føroyum.
Føroyskar tænastuveitingar til maritimt virksemið er á høgum støði og stendur mát við somu tænastu í okkara grannalondum. Vit hava, umvegis boringarnar í Føroyum og vitjanini hjá West Hercules, prógvað, at maritima tænastavinnan í Føroyum er væl og virðiliga kappingarfør á altjóða stigi.
Í arbeiðinum at marknaðarføra føroysku veitaravinnuna er heimasíðan www.maritime-services.com gjørd. Heimasíðan lýsir føroysku veitaravinnuna, deilt upp í vinnugreinar og fyritøkur. Endamálið við síðuni er, at útlendskar fyritøkur lættliga kunnu finna upplýsingar um føroyska vinnnu og fáa greitt innlit í, hvørji vit eru, og allar tær tænastur, sum vit kunnu veita.
Oljuvinnufelagið fegnast eisini um, at landsstýrið hevur sett pening á fíggjarlógina fyri 2016 til at marknaðarføra Føroyar sum ein maritiman tænastudepil.
Offshore Northern Seas 2016
Oljuvinnufelagið samskipar luttøku á Offshore Northern Seas, sum verður í døgunum 29. august - 1. september í Stavanger. Enn er ikki ov seint at melda til. Meira er at frætta um oljumessuna í Stavanger við at venda sær til Jórun Gardar á jorun@industry.fo ella á telefon 739913.
Sí heimasíðu sum lýsir Føroyar og føroyskar maritimar veitingar.
