Komandi mikudag 17. juni kl. 14 verður opið hús í Sjókovanum í Bátasavninum í Leirvík. Sjókovin er ein privatur, óheftur grunnur, sum varð settur á stovn 30. mars í ár. Endamálið hjá grunninum er at stimbra nýhugsan og burðardygga menning og nýskapan í føroyskum sjófeingisvinnum.
Tað kann meldast til tiltakið á heimasíðuni hjá Sjókovanum her.
Umframt at greiða frá um endamál og virksemi hjá grunninum, verður eisini greitt frá um verkætlanina at kanna ávirkanina av COVID-19 á fiski- og alivinnuna. Harumframt verður ein framløga um gagnnýtslu av hagtølum og vitan frá fiskiveiðu og gransking.
Grunnurin Sjókovin hevur tvey virksemisøki:
- Gransking og vitanartænastur við endamálinum at stimbra føroyskar sjófeingisvinnur
- At menna samskifti og samstarv millum sjófeingisfyritøkur (Ocean Cluster Faroes)
