Viðvíkjandi orkuspurninginum so merktu vit í 2008, hvussu viðkvom vinnan er fyri høgum oljuprísum. Tí er tað umráðandi, at minka um hendan vansan og virka fyri, at Føroyar og føroysk vinna fremja orkusparing og alternativa orkuframleiðslu.

Føroya Arbeiðsgevarafelag ásannar, at føroysk vinna sum heild er sera bundin at olju sum orkukeldu, og at henda sannroynd er ein tann størsta avbjóðingin vinnan hevur. Ásannandi, at útlit eru fyri, at oljuprísurin í framtíðini allarhelst fer at sveiggja enn meira, heldur Føroya Arbeiðs-gevarafelag, at tað er umráðandi, at vinnan og myndugleikarnar gera sær greitt, hvønn týdning orka hevur í ymiskum vinnugreinum, og hvussu orkunýtslan og CO₂-útlátið kunnu minkast á ein hátt, so vinnan kann skapa grundarlag fyri tryggum og høgum livistøði í Føroyum.

Grundað á hetta setti Føroya Arbeiðsgevarafelag í 2008 ein strategibólk við umboðum úr vinnuni at lýst hvussu støðan er hjá ymiksum vinnugreinum og at koma við uppskotum um hvussu komast kann fram á leið á hesum økinum.

Tilmælir frá Føroya Arbeiðsgevarafelag í hesum sambandi eru umfatandi og kunnu lesast í frágreiðinini Orku og umhvørvi umframt í serstøkum parti í ársfrágreiðing felagsins 2008