Í samgonguskjalinum hjá verandi samgongu varð avtalað, at eitt vakstrarforum skuldi skipast, sum eitt samstarv millum privata og almenna geiran. Løgmaður setti í byrjanini av 2021 eitt vakstrarforum, sum skuldi gera tilmæli um, hvussu vit kunnu skapa størri virði í føroyska samfelagnum. Vakstrarforum valdi nøkur raðfest øki út, og undirbólkar vórðu settir at gera ítøkilig uppskot, sum kunnu stuðla undir virðisvøkstur innan raðfestu økini. Hesi øki vóru Havið, Kunningar- og samskiftistøkni (KST), Ferðavinna, Veitaravinnu og Útbúgving og arbeiðsmarknaður. Gjøgnumgangandi fyri tey tilmælini, sum eru komin til Vakstrarforum higartil, er tann týdningur, sum útbúgving og gransking hevur fyri virðisvøksturin.

Tá so broytingaruppskotini hjá Fíggjarnevndini vórðu løgd fram, vórðu uppskot til sparingar á flest øllum   raðfestum økjum. Eitt nú kann nevnast sparingar innan gransking og menning í fiskiveiðu og aling (Fiskaaling, Havstovan og Fiskivinnuroyndir), Granskingarráð og -grunn, Maritimar útbúgvingar, Miðnámsútbúgvingar, Visit Faroe Islands, Talgildu Føroyar og Fróðskaparsetur Føroya.

Føroya Arbeiðsgevarafelag skilur ynskið hjá fíggjarnevndini um at tálma útreiðsluvøksturin hjá landskassanum, men tað er ein størri spurningur, sum ikki eigur at vera avgjørdur av hissini broytingum hjá fíggjarnevndini í 12. tíma. Harumframt er neyðugt at raðfesta átøk, sum økja um virðisskapanina í landinum, so vit øll gerast betri fyri, eisini landskassin.

Politiska skipanin eigur at leggja eina ætlan fyri at tálma útreiðsluvøksturin hjá landskassanum, og so gera væl fyrireikaðar broytingar. Við tí arbeiðshátti og raðfestingum, sum vit hava sæð í sambandi við fíggjarlógararbeiðið, er sera torført at leggja langtíðarætlanir, og vandi er fyri at vit missa meira fyri minni.