Ráðgevarafelagið tekur undir við áskoðanini hjá Felagnum Peningastovnar um, at tað skal vera samsvar millum skatting av rentuinntøkum og frádrátti/ella stuðli av rentuútreiðslum, hetta fyri m.a. at tryggja, at øll búðstaðarbygging hevur javnbjóðis møguleikar.
Í seinastu viku vísti Felagið Peningastovnar á, at verandi skipan við rentustuðli ikki er symmetrisk.
Ráðgevarafelagið heldur, at verandi reglur um rentustuðul ikki skunda undir og eggja ikki til eitt fjølbroytt bústaðarmynstur. Tvørturímóti hevur rentustudningur, mvg lóggáva, saman við grundstykkjapolitikkinum hjá kommununum, givið sethúsabygging stórar fyrimunir mótvegis øðrum bústaðarháttum.
Tí tekur Ráðgevarafelagið undir við sjónarmiðunum hjá Felagnum Peningastovnar, at reglurnar um rentustuðul eru órættvísar og mælir til, at øll bústaðarbygging hevur javnbjóðis møguleikar, eisini tá tað snýr seg um fíggjarligar fortreytir.
