Í farnu viku skipaði Mentamálaráðið, í samstarvi við onnur, fyri ráðstevnu um førleikametingar (realkompetansumetingar), og hvussu hetta í øðrum norðurlondum verður nýtt at meta um veruligu førleikarnar hjá tí einstaka, formligar sum ikki-formligar.
Tað vísir seg ofta, at tað kunnu vera forðingar fyri møguleikunum at virka á arbeiðsmarknaðinum, um tú ikki hevur eina formliga útbúgving. Tað kann vera alt frá trupulleikum hjá einum arbeiðsgevara at kunna taka upp lærlingar, til trupulleikar við at fáa eitt nýtt arbeiði, hóast ein persónur hevur drúgvar royndir innan eitt ávíst arbeiðsøki.
Førleikametingar í øðrum norðurlondum verða m.a. nýttar til at skjalprógva førleikar í s.v. upptøku til útbúgvingarpláss. Um førleikametingin vísir, at persónurin hevur viðkomandi førleikar, kann útbúgvingartíðarskeiðið vera stytt, tí persónurin sleppur undan at taka ávís fak, har førleikarnir eru prógvaðir í førleikametingini. Á henda hátt kann ein førleikameting gera tað lættari hjá einum persóni við royndum at fáa pappír uppá sínar førleikar.
Hóast nógv fokus hevur verið á útbúgving og lívslanga læring, hava Føroyar enn onga slíka skipan við førleikameting. Vónandi er áhugin nú kveiktur fyri at stovna slíkar í Føroyum eisini.
