Reiðarafelagið fyri Farmaskip undirskrivaði mikudagin semju við Skipara- og Navigatørfelagið, Maskinmeistarafelagið og Føroya Motorpassarafelag um nýggjar sáttmálar fyri farmaskipini. Sáttmálin er galdandi frá 1. mars 2009 til 1. mars 2011.

Semjan hevur við sær, at lønirnar hækka 3,22% 1. mars í ár og 3,22% 1. mars 2010. Harafturat eru nakrar aðrar broytingar í sáttmálanum, sum tó eru neutralar í mun til yvirskipaða lønarkarmin. Samanumtikið eru lønarhækkingarnar sostatt á sama støði, sum hinir sáttmálarnir, sum gjørdir eru á privata arbeiðsmarknaðinum í hesi samráðingarrunduni.