Valt var at skifta navnið, tí at ein alt størri partur av arbeiðinum hjá limunum í Samskifti snýr seg um virkissamskifti og samskiftisráðgeving. Herundir er sniðgáva og reklama ein natúrligur partur.

Yvir sjeyti væl útbúgvin og roynd fólk starvast hjá føroyskum samskiftisvirkjum. Hesi fólk hava hægri útbúgvingar innan samskifti, marknaðarførslu, búskap, filmsgerð og sniðgávu. Nøkur eru sjálvlærd. Harafturat arbeiðir ein røð av handverkarum í samskiftisvinnuni.

Føroyska samskiftisvinnan hevur fleiri fólk í starvi við altjóða royndum, nøkur føroysk samskiftisvirki hava deild í øðrum landi, og føroysk samskiftisvirki hava vunnið altjóða viðurkenningar. Nøkur av starvsfólkunum hava eisini vunnið virðislønir uttanlands.

Við navnaskiftinum verður latið upp fyri, at onnur virki, sum arbeiða við samskifti og samskiftisráðgeving, kunnu gerast limir.

Við at felagið Samskifti gerst so stórt um gjørligt, verður lættari at gera vart við samskiftisvinnuna sum eina týdningarmikla vinnu í Føroyum, og lættari verður at røkka ígjøgnum til almennu myndugleikarnar.

Í nýggju nevndina hjá Samskifti vóru vald Høgni Rasmussen, Niels Uni Dam og Torkil Johannesen. Úr nevndini fór Gunvá við Keldu, ið ikki stillaði uppaftur. Nevndin hevur ikki skipað seg enn.