10. juni 2008 varð nýggja lógin um tiltøk at minka um royking samtykt í løgtinginum. Endamálið við lógini er at tryggja øllum roykfrítt umhvørvi, og at avmarka markaðarføring og sølu av tubbaki.
Royking hevur verið bannað á almennum arbeiðsplássum í fleiri ár. Nú umfatar roykilógin eisini privat arbeiðspláss har fleiri enn eitt starvsfólk starvast. Forboðið er galdandi fyri øll hølir har ein ella fleiri arbeiðstakarar arbeiða. Somuleiðis fyri flutningsfør so sum hýruvognar, bussar, ferjur, bátar, flogfør og tyrlur.
Lógin hevur tó undantøk. Leiðslan á privatari fyritøku kann taka avgerð um, at loyvt er at roykja í serstøkum roykirúmum, sum bert eru ætlað at roykja í. Loyvið er tó treytað av, at roykur ikki er til ampa ella vanda fyri onnur, í øðrum pørtum av bygninginum.
Lógin ásetur, at Arbeiðseftirlitið og Skipaeftirlitið hava alment eftirlit við lógini og kunnu melda brot á lógina. Brot á lógina verða sektaði við bót.
