Tiltak: Hvussu kunnu arbeiðsgevarar skapa ein rúmligari arbeiðsmarknað fyri fólk við ymiskum førleikum?

Sosial burðardygd og rúmligi arbeiðsmarknaðurin verða sett á skránna, tá ið netverkið Varandi Vinna skipar fyri kunnandi tiltaki í Vinnuhúsinum mikudagin 17. juni.

Tiltakið snýr seg um, hvussu arbeiðspláss kunnu lofta fólki, sum í dag standa uttan fyri arbeiðsmarknaðin, ella sum kenna seg føst í skipanum uttan møguleika at flyta seg víðari.

Kristianna Torbjarnardóttir frá Almannaverkinum, Elin Ludvig frá Dugna og Høgni í Stórustovu frá ALS fara at greiða frá teimum skipanum, sum eru tøkar, og hvar arbeiðspláss kunnu fáa hjálp og vegleiðing.

Eisini verður høvi at hoyra frá einum borgara, sum greiðir frá sínum royndum við skipanunum og tilgongdini at koma út á arbeiðsmarknaðin.

Jenny A. í Heiðunum frá Hotel Djurhuus, sum varð kosið ársins rúmligi arbeiðsgevari í 2025, fer eisini at greiða frá sínum royndum við at skapa eitt rúmligt arbeiðspláss.

Tiltakið verður í Vinnuhúsinum mikudagin 17. juni kl. 14.00-15.30.

Tiltakið er ókeypis fyri limir í feløgunum í Vinnuhúsinum, men neyðugt er at boða frá luttøku. Melda til niðanfyri.

 Skjal um viðgerð av persónsupplýsingum