Í ár skal Sansir standa fyri at sniðgeva og byggja føroyska landabásin á Seafood Expo Global í Barcelona
Undan jólum varð nýggjur sáttmáli undirskrivaður millum Føroya Arbeiðsgevarafelag og Sansir um føroyska landabásin á fiskavørumessuni í Barcelona.
Seafood Expo Global verður hildin í døgunum 21.–23. apríl 2026 og er heimsins størsta sølumessa innan fyri sjógæti. Føroyskar fyritøkur hava luttikið á messuni heilt frá byrjan og hava í nógv ár havt ein felags føroyskan landabás.
Frá vinstru: Tór Verland Johansen, Barbara Maria Lamhauge, Bára Gunnarsdóttir og Niels Winther
Føroyski landabásurin er 428 fermetrar til støddar. Tað er Føroya Arbeiðsgevarafelag, sum samskipar føroyska básin, meðan Sansir hevur ábyrgdina av sniðgeving og uppsetan.
Við á føroyska landabásinum í 2026 verða hesar fyritøkur:
Bakkafrost, Enniberg, Hiddenfjord, JFK, Kósin, Landshandilin, Maresco, North Pelagic, Pelagos, PRG, Rainbow Seafood, Vaðhorn og Varðin Pelagic.
Umframt hesar 13 fyritøkurnar luttaka eisini fleiri aðrar føroyskar fyritøkur og persónar á Seafood Expo Global 2026, sum sostatt aftur í ár verður ein týðandi pallur at sýna føroyska sjógætisvinnu fram altjóða.
