Tað verður Sansir, sum skal standa fyri at byggja føroyska landabásin á fiskavørumessuni Seafood Expo Global í Barcelona í 2025. Eisini fer Sansir at veita aðrar tænastur í hesum sambandi
6. til 8. mai 2025 verður Seafood Expo Global, sum er heimsins størsta sølumessa innan sjógæti. Føroyskar fyritøkur hava luttikið á Seafood Expo Global frá byrjan.
Nýggj avtala
Føroya Arbeiðsgevarafelag samskipar føroyska landabásin, og í mars 2024 bjóðaði Føroya Arbeiðsgevarafelag uppgávuna út í almennum útboði, og setti eina metingarnevnd við fólki úr Vinnuhúsinum og umboðum fyri luttakandi fyritøkurnar á føroyska landabásinum.
Mikudagin 19. juni varð avtalað undirskrivað við Sansir. Sansir hevur tískil fingið ábyrgdina av sniðgeving og øðrum praktiskum tænastum á landabásinum, og tey koma at arbeiða í tættum samstarvi við Vinnuhúsið og luttakandi fyritøkurnar.
Farið verður nú undir at fyrireika gólvplássið til 2025. Freistin hjá Føroya Arbeiðsgevarafelag at lata umsóknina til fyriskipararnar av messuni um gólvpláss er í juli 2024.
