Áhugin fyri Vinnudegnum er aftur í ár stórur, og væntandi verða knapt 400 føroysk vinnulívsfólk og fólk, ið hava tilknýti til føroyska vinnu, í Norðurlandahúsinum fríggjadagin 28. september.

Skráin fyri Vinnudagin 2012 er fjølbroytt við áhugaverdum fyrilestrum, spennandi kjaki og sjálvandi avdúkingini av Ársins Virki og Ársins Átaki.

Á skránni eru  fyrilestrar við Asger Aamund, stjóra í A. J. Aamund og nevndarformaður í Bavarian Nordic, Jóannes Niclassen, stjóra í MT Højgaard í Grønlandi og Ragnar Joensen, stjóra í Marine Harvest Norway.

Aftur hesuferð verður spennandi kjak á skránni. Kjakið verður undir heitinum “Skal føroyskt vinnulív hava sersømdir?”. Til at kjakast um hetta evni hava vit fingið Maluna Johansen, búskaparfrøðing, Fróða Magnussen, stjóra á Formula og Árna Winther, stjóra á Árni Winther Arktitektar. Kjakið verður stýrt av Una Arge og Liljan Weihe.

Tilmelding til Vinnudagin fer fram á www.industry.fo ella við at ringja til Vinnuhúsið á telefon 309900.