Áhugin fyri Vinnudegnum er aftur í ár stórur, og væntandi verða knapt 400 føroysk vinnulívsfólk og fólk, sum hava tilknýti til føroyska vinnu, í Norðurlandahúsinum fríggjadagin 25. september.

Skráin fyri Vinnudagin 2015 er fjølbroytt við áhugaverdum fyrilestrum, spennandi kjaki og sjálvandi avdúkingini av Ársins Virki og Ársins Átaki.

Á skránni eru fyrilestrar við Kristin Skogen Lund, stjóra í Næringslivets Hovedorganisasjon, Jesper Bo Jensen, stjóra í Fremforsk og Rúnar Reistrup, stjóra í Depop.

Aftur í ár verður spennandi kjak á skránni, og í ár er evnið “Hvussu skapa vit 1000 nýggj arbeiðspláss í Føroyum?”. Til at kjakast um hetta evni hava vit fingið Jón Sigurdsson, stjóra í Articon, Katrin Petersen, verkætlanarleiðara fyri Vakstrarætlanina Sandoy og Jógvan Gregersen, stjóra á Vaðhorn. Kjakið verður stýrt av Stefan í Skorini og Jón Brian Hvidtfeldt.

Tilmelding til Vinnudagin fer fram á www.industry.fo ella við at ringja til Vinnuhúsið á telefon 309900.