Stórur áhugið er aftur í ár fyri at luttaka á hátíðardegnum hjá føroyskari vinnu, sum verður fríggjadagin. Nøkur fá pláss eru eftir til dagin í Norðurlandahúsinum, og færri enn 10 pláss eru eftir til veitsluna aftaná.
Sostatt verða knapt 400 føroysk vinnulívsfólk og onnur við tilknýti til føroyska vinnu í Norðurlandahúsinum fríggjadagin 28. september.
Skráin fyri Vinnudagin 2018 er fjølbroytt við fleiri áhugaverdum fyrilestrum og sjálvandi avdúkingini av Ársins Virki og Ársins Átaki.
Fyrilestrahaldararnir í ár verða:
Julio Zaguini, sum í fleiri ár hevur starvast í Silicon Valley sum stjóri í risafyritøkuni Google. Í dag er hann íleggjari og ráðgevi innan innovatión og teknologiska menning.
Heiða Gunnarsdóttir Nolsøe, stjóri í Dropbucket. Sum lesandi stovnaði Heiða, saman við Marie S. Berggreen, fyritøkuna Dropbucket, sum selur einnýtis ruskspannir, og Dropbucket hevur síðani vunnið prísir, bæði í Norðurlondum og í altjóða design kapping.
Jonne Hellgren, stjóri og ein av stovnarunum av RePack. RePack er skjótt vaksandi fyritøka, sum veitir burðardyggar endurnýtsluloysnir innan pakka- og flutningstilfar til e-handil. Fyritøkan fekk norðurlendsku umhvørvisvirðislønina í 2017.
Eisini verður spennandi røð við styttri fyrilestrum undir heitinum “Lopið ut í heim – royndirnar hjá føroyskum fyritøkum”. Her fara Árni Skaale, stjóri í LookNorth, Mariann Klein Ivansdóttir, stjóri í Royal Intercoiffure, Karin Visth, vínserfrøðingur á KOKS, og Guðrun Rógvadóttir, stjóri í Guðrun & Guðrun, greiða frá teirra royndum við at selja vørur sínar til heimsmarknaðin.
Tilmelding til Vinnudagin fer fram á www.industry.fo ella við at ringja til Vinnuhúsið á telefon 309900.
