Sáttmálarnir fyri Føroya Tele og Posta eru soleiðis endin á samráðingarumfarinum, sum Føroya Arbeiðsgevarafelag byrjaði við sáttmálunum við arbeiðarafeløgini í 2007.
Føroya Arbeiðsgevarafelag og Starvsmannafelagið undirskrivaðu í gjár, 22. desember 2009, semju um nýggjar eitt-ára sáttmálar fyri Føroya Tele og Posta.
Kostnaðurin av nýggju sáttmálunum er 3,2% fyri hetta eina árið. Nakað av karminum fór til hækkaði vaktargjøld, og annars fór restin á lønina.
Sáttmálarnir fyri Føroya Tele og Posta vóru teir seinastu í hesum samráðingarumfarinum hjá Føroya Arbeiðsgevarafelag, og er hækkingin, sum nú varð løgd á hesar sáttmálar, hin sama sum arbeiðarafeløgini fingu 1. mai 2009 og handverkararnir 1. oktober 2009.
Nýggja samráðingarumfarið hjá Føroya Arbeiðsgevarafelag byrjar 1. mai 2010, tá sáttmálarnir við arbeiðarafeløgini ganga út.
