Aftur hesuferð eru fleiri áhugaverdir fyrilestrar á skránni, Ársins Virki og Ársins Átak verða kosin og dagurin endar við veitslu fyri luttakararnar.

Einki serstakt evni er valt hesuferð, men ikki kemst uttanum, at fíggjarligu avbjóðingarnar vit møta í løtuni, merkja skránna.

Liselotte Lyngsø er futurist og altjóða serfrøðingur innan nýskapan og framtíðargransking. Hon fer at hyggja eftir, hvussu fyritøkur í krepputíðum framhaldandi kunnu verða innovativar. Liselotte Lyngsø hevur m.a. verið granskingarleiðari á Instituttet for Fremtidsforskning og er í dag partnari í Future Navigator, sum ráðgevur um framtíðargrundaða hugskotsmenning.

Ragnar Johannesen er løgfrøðingur á stóru bretsku advokatskrivstovuni Herbert Smith. Hann er serfrøðingur innan fígging, serstakliga lánsfígging. Á Vinnudegnum fer hann at tosa um “foreign direct investment”, og hvussu tað kundi verið vanligari í føroyskum vinnulívi.

Thór Sigfússon, búskaparfrøðingur og formaður í íslendska arbeiðsgevarafelagnum, Samtøk Atvinnulífsins, fer at tosa um gongdina í Íslandi, og hvussu framtíðarmøguleikarnir eru. Thór Sigfússon hevur verið stjóri í tryggingarfelagnum Sjóvá og hevur eisini verið dagligur stjóri í íslendska Chamber of Commerce.

Páll Isholm, leiðari á Føroya Handilsskúla á Kambsdali, er kendur frá m.a. sendingini Bart út í útvarpinum. Hann fer at geva okkum síni sjónarmið um lærdómin, og hvønn týdning lærdómur hevur fyri menningina av samfelagnum. Umframt starvið á Handilsskúlanum hevur Páll Isholm verið borgarstjóri og bygdaráðslimur í Gøtu kommunu.

Nærri verður lýst um tilmelding og kostnað seinast í august mánaði.