Gunnar Skúvadal varð kosin Ársins ferðavinnufólk, meðan KG fekk heiðurin sum Ársins átak á árligu Ferðavinnustevnuni
Farna fríggjadag skipaði Ferðavinnufelagið fyri árligu Ferðavinnustevnuni. Á skránni vóru framløgur um mentanarmunir, altjóða arbeiðspláss og møtið millum ymiskar mentanir. Um kvøldið vórðu ársins heiðursbrøv handað.
Gunnar Skúvadal – Ársins ferðavinnufólk
Gunnar Skúvadal fekk heiðurin sum Ársins ferðavinnufólk 2026 fyri sítt ótroyttiliga arbeiði og stóra íkast til ferðavinnuna.
Í grundgevingini varð dentur lagdur á, at hann í nógv ár hevur verið ein av berandi kreftunum, og at hann hevur skapt serstakar upplivingar við at sameina søgu, mentan, matupplivingar og náttúru.
Dómsnevndin lýsti Gunnar sum eina sanna eldsál, ið hevur gjørt stóran mun.
KG – Ársins átak
Heiðurin sum Ársins átak 2026 fór til KG, sum við stórari íløgu hevur skapt nýggjar møguleikar í føroyskari ferðavinnu.
Í grundgevingini varð víst á dirvið og nýhugsanina aftan fyri verkætlanina, har framkomnir hentleikar, vælvera og stórsligin náttúra eru sameind í eitt serstakt ferðavinnutilboð.
Dómsnevndin staðfesti, at KG er eitt nýbrot, sum gevur økinum nýtt lív og er eitt týðandi íkast til menningina av ferðavinnuni.
Mentanarmunir á breddanum
Á ráðstevnuni vóru mentanarmunir og mentanarfatan høvuðsevni. Fía Lindenskov, Jóna Thomsen, Poul Andrias Ziska, Sylvia Garduno Magnussen, Annika S. Biskopstø og Jógvan Jón Henriksen lýstu úr ymiskum sjónarhornum, hvussu mentanarmunir ávirka samstarv, leiðslu og upplivingar í ferðavinnuni.
Dómsnevndin
Í dómsnevndini sótu Henny á Líknargøtu frá Ferðavinnufelagnum, Guðrið Højgaard frá Visit Faroe Islands og Annika Lisberg frá Kunningarstovunum.
