Hóast arbeiðarafeløgini høvdu sent út yvirlýsing um, at tey hesuferð vildu samráðast, var veruleikin í semingsroyndini ein annar. Tað var yvirhøvur eingin samráðingarvilji.
Semingsroyndin millum Føroya Arbeiðsgevarafelag og arbeiðarafeløgini endaði í stórum vónbroti. Hóast almenna yvirlýsingin um samráðingarvilja, vísti semingsroyndin, at arbeiðarafeløgini ikki vildu flyta seg. Tvørturímóti vórðu krøvini herd.
”Tá forfólkini í teimum fýra arbeiðarafeløgunum gjørdu sær tann ómak at senda út eina yvirlýsing um, at tey vildu samráðast, hildu vit, at tey meintu nakað við tað. Men har var eingin vilji at flyta seg yvirhøvur, og tað hava vit ongantíð upplivað í slíkari samráðing áður,” sigur Niels Winther, stjóri í Føroya Arbeiðsgevarafelagi.
Føroya Arbeiðsgevarafelag hevur fleiri ferðir alment boðað frá, at felagið hevur flutt seg, og er til reiðar at gera semju um eina søguliga høga lønarhækkan. Føroya Arbeiðsgevarafelag hevur ein veruligan vilja at samráðast, treytað av, at arbeiðarafeløgini vilja gera tað sama. Tað nyttar ikki at seta seg við samráðingarborðið, um báðir partar ikki vilja flyta seg.
Men heldur enn at nærkast, vísti semingsroyndin, at arbeiðarafeløgini heldur høvdu flutt seg longri burtur frá arbeiðsgevarunum. Ófrávíkiligi krøvini hjá arbeiðarafeløgunum vóru hækkað síðani semingsmaðurin fór undir at tilevna fyrsta semingsuppskotið.
”Vit halda tað verða óseriøst og ábyrgdarleyst at senda yvirlýsing út, fyri síðani at gera tað øvugta av tí, man hevur signalerað. Fyri at siga tað akkurát sum tað er, so føla vit okkum hildin fyri gjøldur. Vit vita, at tað eru nógvir føroyingar, sum veruliga høvdu vónað, at semingsroyndin bar á mál, og vit kunnu bara harmast, at tað ikki eydnaðist. Men fortreytin fyri einari semju er, at mótparturin eisini vil samráðast og flyta seg, og tað var tíverri ikki støðan í hesari semingsroyndini.” sigur Niels Winther at enda.
