Týsdagin í farnu viku skipaði Sjóvinnufelagið fyri kunnandi tiltaki samband við, at Rosebank feltið verður útbygt beint eystanfyri føroyska markið

Týsdagin 16. januar skipaði Sjóvinnufelagið fyri kunnandi tiltaki á Hotel Hilton Garden Inn. Tiltakið var gjørt í góðum samstarvi við FOÍB (Føroya Orkuídnaðarbólkur). Á tiltakinum greiddu leiðandi fólk frá stóra orkufelagnum Equinor frá stóru útbyggingini av Rosebank olju- og gasskelduni beint eystanfyri føroyska markið. Millum annað greiddi ovasti stjórin hjá Equinor í Bretlandi, Arne Gürtner, frá virkseminum hjá Equinor bæði innan olju, gass og hartil eisini innan varandi orku.

Tiltakið var ætlað øllum, ið hava áhuga og tilknýti til føroyska sjóvinnu, og veitarar til sjóvinnuna í Føroyum. Staðfestast kann at áhugin er stórur, tí nógv fólk frá umleið 50 ymiskum fyritøkum luttóku, umframt fleiri politikar og onnur við tilknýti til vinnuna í Føroyum. Ferðalagið frá Equinor fegnaðist eisini um stóra áhugan frá føroysku sjó- og tænastuvinnuni fyri verkætlanini.

Eftir framløgurnar var møguleiki at seta spurningar, og eftir almenna tiltakið skipaði Sjóvinnufelagið eisini fyri kjaki millum limir felagsins.