Vitjan úr Suðurkorea setti sjóneykuna á fiskavørur, marknaðaratgongd og møguleikarnar fyri at menna samhandilin millum londini
Ein suðurkoreansk sendinevnd vitjaði Vinnuhúsið fyri at kanna møguleikarnar fyri øktum samhandli.
Yang Young Jin, aðalstjóri í Fisheries Policy Bureau, stóð á odda fyri sendinevndini.
Á fundinum greiddi Niels Winther, stjóri í Vinnuhúsinum, frá føroyskum útflutningi og legði serliga dent á týdningin av einari fríhandilsavtalu millum Føroyar og Suðurkorea.
"Vitjanin er komin í lag í kjalarvørrinum á føroysku handilsferðini til Suðurkorea í juni. Tað tykist at vera veruligur áhugi fyri at keypa føroyskar fiskavørur og við tíðini at menna samhandilin enn meira", sigur Niels Winther.
Sendinevndin vitjaði eisini Uttanríkis- og fiskimálaráðið. Har undirritaðu partarnir eina Declaration of Intent um millum annað samstarv og menning av útflutninginum av føroyskum fiskavørum til Suðurkorea.
