Á Vinnudegnum fer Thomas Erikson at greiða frá, hvussu vit betur kunnu skilja tey, vit annars hava ringt við at skilja ella samskifta við

Thomas Erikson úr Svøríki er kendur um allan heimin fyri sínar bøkur í røðini “Surrounded by…”, eitt nú Surrounded by Idiots, sum er útgivin á mongum málum og seld í milliónatali. 

Í bókunum ger hann stuttliga, men samstundis gjølliga greining av ymsum persónleikum og samskiftismynstrum, og hann gevur lesaranum praktisk amboð til at skilja og handfara fólk við ymsari atferð.

Thomas er bæði rithøvundur og atferðarserfrøðingur, og hann hevur arbeitt við ráðgeving og skeiðum fyri fyritøkum, leiðarum og einstaklingum í fleiri ár.

Hann hevur serligan førleika at gera torskild evni løtt at skilja, og hann dugir at seta orð á tað, vit øll uppliva í gerandisdegnum: At tað kann vera trupult at samskifta við fólk, sum hugsa og handla øðrvísi, enn vit sjálvi.

Vinnudagurin verður í Norðurlandahúsinum 19. september. Her hittast fólk tvørtur um vinnugreinar og áhugamál, og her verður bæði hugsað frameftir og aftureftir. 

Tað er eisini dagurin, tá ið Ársins Virki og Vinnuátakið verða kosin, og nýggj hugskot og samstarv kanska verða fødd.

Les meira um Thomas Erikson her.