Tíðin rennur, og í kvøld á midnátt gongur freistin at melda til Vinnudagin 19. september út
Tað er framvegis møguligt at tryggja sær pláss á Vinnudegnum 2025, men freistin at melda til gongur út í kvøld á midnátt. Enn eru nøkur pláss eftir bæði í Norðurlandahúsinum og til veitsluna aftaná.
Á hvørjum ári savnast føroysk vinnulívsfólk og onnur við tilknýti til føroysku vinnuna á Vinnudegnum. Í ár verður hátíðardagur vinnunnar hildin fríggjadagin 19. september í Norðurlandahúsinum.
Hetta er dagurin, har vit hittast til bæði gaman og álvara, við fjølbroyttari skrá av fyrilestrum, samrøðum og serstøku avdúkingini av Ársins Virki og Vinnuátakinum.
Í steðgunum í Norðurlandahúsinum verður eisini høvi at práta við veitarar, kundar og samstarvsfelagar aftur við brellbitum, drekka og tónleiki.
Skráin í ár
Á Vinnudegnum fara luttakararnir at hoyra framløgur frá bæði altjóða og føroyskum gestum:
Thomas Erikson (Svøríki), víðakendur atferðarserfrøðingur og rithøvundur av bókarøðini “Surrounded by…”, gevur amboð til, hvussu vit kunnu skilja tey, sum vit ikki skilja.
Brian Sørensen (Danmark), íverkseti og stovnari av Cult Energy, sigur frá ferðini frá hugskoti til verkætlan, og hvussu hann í dag byggir víðari í fyritøkuni PadelPadel.
Vera Antonsdóttir (Ísland), stjóri í Grósku – miðdeplinum fyri nýskapan og samstarv millum vinnu og gransking – gevur dømi um, hvussu hugskot kunnu mennast til ítøkiligar íløguætlanir.
Ben Arabo (Føroyar), stjóri í Framtak, greiðir frá, hvussu vit í Føroyum kunnu gera okkum meira spennandi fyri íløgufólk, og hvussu hugskot kunnu flytast til ítøkiligar íløguætlanir, hóast vit eru eitt lítið samfelag.
Harumframt verður ein røð av styttri fyrilestrum undir heitinum “Hvussu lofta vit hugskotum?”:
- Símin P. Sivertsen, Bergfrost
- Rógvi Róin, Petur Larsen
- Harriet Olafsdóttir av Gørðum, bóndi og íverkseti
Teirra framløgur geva innlit í, hvussu føroyskar fyritøkur arbeiða við nýskapan og flyta hugskot frá fyrstu tonkunum til ítøkilig úrslit.
Dagin í Norðurlandahúsinum fer Kjartan Hansen at leiða sum orðstýrari.
Seinasta freist at melda til er í dag á midnátt.
