Vinnuhúsið ynskir nýggju samgonguni og landsstýrinum blíðan byr við arbeiðinum komandi árini og vónar, at kappingarføri og størri nýskipanir fara at mynda dagsskránna
Eitt nýtt landsstýri hevur tikið við landsins leiðslu. Samgongusamráðingarnar gingu skjótt, og vónandi gongur tað eins skjótt at koma í arbeiðshandskarar í nýggja landsstýrinum. Tí avbjóðingarnar eru stórar og nógvar, bæði her heima hjá okkum og úti í heimi.
Altjóða avbjóðingar krevja góðar karmar og neyva stýring
Summar avbjóðingar hevur nýggja samgongan onga ávirkan á, serliga altjóða viðurskifti. Tá er uppgávan at tryggja, at bæði føroyski búskapurin og landskassin eru væl brynjaðir, so hendingarnar úti í heimi ikki fáa størri ávirkan enn neyðugt hjá okkum í Føroyum.
Samgongan kann ikki stýra altjóða leiðarum. Hon kann ikki stýra krígnum í Ukraina ella í Miðeystri. Hon kann ikki stýra sveiggjum í oljuprísinum ella rentustøðinum. Men hon kann stýra karmunum hjá føroysku vinnuni.
Um føroyskar fyritøkur eru kappingarførar, skapa tær virði. Og tá kann landskassin bera meira. Um fyritøkurnar hinvegin missa kappingarførið, hvørvur grundarlagið spakuliga.
Og tað ber til at stýra landshúsarhaldinum. Um almenni raksturin er mótstøðuførur og langtíðarhaldførur, ber til at lofta teimum avbjóðingum, sum koma, uttan at tað fær alt ov ógvusligar avleiðingar fyri samfelagið.
Tí eru hyggjuráðini at byrja við at spyrja: “Hvat kunnu vit bera?” fyri síðani at kunna svara spurninginum: “Hvat kunnu vit lova?”
Heimligar avbjóðingar krevja nýskipanir
Ikki allar avbjóðingar koma úti úr heimi. Summar avbjóðingar kunnu vit sjálvi loysa. Listin yvir avbjóðingar og átøk er langur, men tær stóru samfelagsavbjóðingarnar krevja størri nýskipanir á fleiri økjum:
- Gera Føroyar lokkandi sum stað hjá ungum fólki at búgva og virka í
- Fáa skikkað starvsfólk til samfelagstørvin
- Fleiri og meira fjølbroyttar bústaðir
- Betri marknaðaratgongd fyri okkara vørur og tænastur
- Fáa ferð á grøna orkuskiftið
- Effektivisera almenna raksturin
Vinnuhúsið ynskir samgonguni blíðan byr og góðan arbeiðshug. Føroyska samfelagið hevur brúk fyri tí.
