Norðurlandahúsið er aftur karmur um ársins Vinnudag, og týsdagin um eina viku kunnu limir tryggja sær pláss, tá ið tilmeldingin letur upp

Týsdagin 18. august letur tilmeldingin upp fyri limum í Føroya Arbeiðsgevarafelag og undirfeløgum tess til Vinnudagin 2025. Tiltakið, sum er hátíðardagur vinnunnar, verður hildið fríggjadagin 19. september í Norðurlandahúsinum.

Føroya Arbeiðsgevarafelag skipar fyri tiltakinum, og eins og undanfarin ár verða karmarnir serstakir og skráin fjølbroytt og spennandi. Tá ið fyrilestrarnir eru av í Norðurlandahúsinum, verður skipað fyri veitslu í hølunum hjá Dansifrøi, sum verður umskapað og endavent til høvið.

Vinnudagurin er hátíðardagur vinnunnar, har fólk tvørtur um vinnugreinar og áhugamál hittast til íblástur og netverkan. Tað verður hugsað bæði í tátíð, nútíð og framtíð, og á degnum verða heiðurslønirnar Ársins Virki og Vinnuátakið latnar.

Skráin fyri Vinnudagin 2025 verður almannakunngjørd í næstu viku, og á skránni eru nógvar áhugaverdar og viðkomandi framløgur.