Føroya Arbeiðsgevarafelag setur nú kikaran á fíggjarpolitiska haldførið. Tiltakið “Haldførið – hvat nú?” verður í Smæruni mánadagin 12.februar millum kl. 13 og 15.30

Føroya Arbeiðsgevarafelag skipar seinnapartin tann 12. februar fyri einum tiltaki um fíggjarpolitiska haldførið. Á tiltakinum verður dentur lagdur á, hvørji átøk eru skilagóð at gera eftir nýggju haldførisfrágreiðingina hjá Búskaparráðnum.

Framløgur og orðaskifti
Fróði Magnussen, formaður í Búskaparráðnum, leggur fyri við at taka aftur í høvuðsniðurstøðurnar í frágreiðingini hjá Búskaparráðnum. Síðani fer Carl – Johan Dalgaard, formaður í danska Búskaparráðnum, at greiða nærri frá, hvussu Danmark skipanarliga arbeiðir við haldførinum.

Síðani verður eitt pallborð við Turið F. Arge, forstjóra í BankNordik, Niels Winther, stjóra í Vinnuhúsinum og Duritu Tausen, varastjóra á Gjaldstovuni.

Tiltakið endar við samrøðum við Tórbjørn Jacobsen, formanni í Kommunufelagnum, og Ruth Vang, landsstýriskvinnu í fíggjarmálum.

Tiltakið verður í Smæruni mánadagin 12.februar millum kl. 13 og 15.30.