Nú eru útlit fyri, at fyrstu næmingarnir kunnu byrja longu fyrst í november. KT-felagið fegnast og vónar, at vinnan tekur væl ímóti útbúgvingini
Arbeiðið við at seta á stovn eina føroyska útbúgving til KT-supportara er nú komið so langt, at fyrstu næmingarnir væntandi kunnu byrja longu fyrst í november.
Ein føroysk KT-supportaraútbúgving hevur í fleiri ár verið eitt ynski hjá KT-felagnum. Felagið fegnast tí um, at ætlanin nú er um at gerast veruleiki, og vónar, at bæði ung og vaksin fara at taka væl ímóti nýggja útbúgvingarmøguleikanum.
Samstundis er avgerandi, at vinnan tekur væl ímóti útbúgvingini. Ein yrkisútbúgving er treytað av, at fyritøkur og arbeiðspláss eru sinnað at taka lærlingar til sín og geva teimum møguleika at menna sínar førleikar í verki.
KT-felagið vónar tí, at nóg nógv lærupláss verða tøk, so útbúgvingin fær eina góða byrjan og kann mennast til ein fastan part av føroyska útbúgvingartilboðnum.
Útbúgvingin er ikki bert ætlað fyritøkum í KT-vinnuni. KT er í dag ein grundleggjandi partur av virkseminum hjá nærum øllum fyritøkum og stovnum, og tørvurin á KT-førleikum er stórur í øllum vinnugreinum.
Tí kunnu eisini fyritøkur og stovnar uttan fyri sjálva KT-vinnuna hava gagn av at taka ein KT-supportaralærling.
KT-felagið vónar, at áhugin verður góður bæði millum komandi næmingar og arbeiðsgevarar, og at útbúgvingin við tíðini kann gerast ein fastur partur av føroyska útbúgvingartilboðnum og vera við til at nøkta vaksandi tørvin á KT-førleikum á føroyska arbeiðsmarknaðinum.
Mynd: Nema
