Javnaðarflokkurin ásannar, at broytingar skulu gerast í fiskivinnuni. Eisini leggur flokkurin dent á, at vísindaligu tilráðingarnar skulu fylgjast. Føroya Arbeiðsgevarafelag heldur tó ikki, at “tilfeingisgjaldið fer at hava við sær skynsamari nýtslu av tilfeinginum”, soleiðis sum Javnaðarflokkurin tekur til. Tað er tørvur á at lækka veiðitrýstið, og tað er ein tílík broyting, ið vildi viðført eina skynsamari nýtslu av tilfeinginum.

Føroya Arbeiðsgevarafelag tekur ikki undir við einum tilfeingisgjaldi, um avlagandi stuðulsskipanir ikki eisini verða avtiknar, herundir skattalættin til sjófólk.Vit mugu hava í huga, at vit við at gera hesar broytingar kunnu økja um virðið og avlopið í vinnuni, og hervið fáa vit eisini eitt størri avkast til samfelagið. Føroya Arbeiðsgevarafelag er tí eisini ivasamt í mun til ætlanirnar hjá Javnaðarflokkinum at nýta tilfeingisgjaldið til økisjavningargrunn, konjunkturjavningargrunn og arbeiðsmarknaðardepil.

Viðvíkjandi ætlanini við einum arbeiðsmarknaðardepli, so er tað eisini eitt sjónarmið hjá Føroya Arbeiðsgevarafelag í vinnusjónarmiðum sínum. Tað hevur tó týdning, at hetta verður gjørt í tøttum samstarvi við partarnar á arbeiðsmarknaðinum.

Føroya Arbeiðsgevarafelag fegnast um, at Javnaðarflokkurin hevur sett sjóneykuna á skattaskipana og tørvin at lækka marginalskattin. Felagið heldur tó ikki, at partafelagsskatturin skal hækka, ella at nýtslugjøld sum kringvarpsgjaldið og heilsutrygd skulu leggjast inn í skattaskipanina, tvørturímóti eiga fleiri nýtslugjøld at ásetast, samstundis sum marginalskatturin lækkar.

Føroya Arbeiðsgevarafelag fegnast tó um ætlanina hjá Javnaðarflokkinum við størri útboði av almennum keypi og arbeiði. Eisini á skúlaøkinum hevur Javnaðarflokkinum sett sær mál, sum Føroya Arbeiðsgevarafelag tekur undir við. At skipa fólkaskúlan í størri eindir og fáa fleiri útbúgvingartilboð á Setrinum. Eisini stóru ambitiónirnar fyri okkara ungu eru at fegnast um, tó heldur Føroyar Arbeiðsgevarafelag, at dentur eisini eigur at leggjast á yrkisútbúgvingar.