Valstríðið til løgtingsval 2011 nærkast endanum. Flokkarnir og valevnini eru komin við hópin av vallyftum, ið hava stórar útreiðslur við sær. Við verandi búskaparstøðu í huga, so kann ikki nakar ivi vera um, at vallyftir uttan búskaparvøkstur er bluff.
Fyri at nøkur av rættiliga gyltu vallyftunum kunnu fremjast, so er umráðandi at fáa skapt búskaparvøkstur í Føroyum. Í bóklinginum “Koyrið so á motorin” hevur Føroya Arbeiðsgevarafelag í vinnusjónarmiðum sínum eina røð av tiltøkum at fremja, soleiðis at vit kunnu skapa vøkstur og trivnað í Føroyum.
Føroya Arbeiðsgevarafelag hevur fýra høvuðstilmæli, og eisini fleiri uppskot til onnur tiltøk. Tey fýra høvuðstilmælini eru hesi:
1. Tað skal loysa seg at arbeiða - skattanýskipan við lægri marginalskatti
2. Skil má fáast á fiskivinnuna - vit mugu innheinta mista virði á um hálva milliard árliga umframt annan vinning í virðisøking av okkara fiskatilfeingi
3. Skilvís almenn fíggjarstýring – hallið á fíggjarlógini má burtur, tiltøk gerast í mun til bygnaðarliga hallið
4. Vit mugu røkja okkara tilfeingi – varðveita eina lutfalsliga stóra og dygdargóða arbeiðsfjøld, røkja okkara náttúrutilfeingi, tøkan kapital og hækka vitanarstøðið
