Uppgávan hjá almennum stovnum, so sum Brúkaraumboðnum, er ikki at selja skeið til vinnufyritøkur. Tað eru longu vinnufyritøkur á marknaðinum, sum bjóða seg fram at skipa fyri skeiðum.
Brúkaraumboðið viðmerkti í farnu viku sjónarmiðið hjá vinnugreinafelagnum Samskifti um skeið, sum Brúkaraumboðið bjóðar. Í viðmerkingini spyr Brúkaraumboðið, um Vinnuhúsið heldur tað vera í lagi, at almennir stovnar selja skeið til undirprís. Sjálvandi er tað ikki í lagi!
Tað eru fyritøkur, sum burturav hava sum sítt virksemi at selja skeiðsvirksemi
- Marita Rasmussen, stjóri
Føroya Arbeiðsgevarafelag, sum rekur Vinnuhúsið, hevur ta yvirskipaðu áskoðan, at almennir stovnar skulu halda seg frá at selja vørur ella tænastur, sum vinnufyritøkur eins væl kundu veitt. Hetta er eisini galdandi fyri skeið. Tað eru fyritøkur, sum burturav hava sum sítt virkisøki at selja skeiðsvirksemi av ymiskum slagi, og liggur slíkt virksemi munandi betri hjá hesum fyritøkum enn hjá einum almennum stovni. At tað almenna av og á heldur kunningarfundir um nýggja lóggávu uttan kostnað fyri fyritøkurnar, er sjálvandi ikki ein trupulleiki í hesum sambandi.
Eisini vinnugreinafeløg velja at bjóða kunning og skeið til sínar limir, sum liður í arbeiðnum at menna vinnugreinina, og kundi Brúkaraumboðið eisini valt at samstarva við hesi feløg.
