Vinnudagurin 2008 verður fríggjadagin 26. september. Seinni í vikuni verður innbjóðing send limum í Føroya Arbeiðsgevarafelag, ið síðan kunnu boða frá luttøku á heimasíðuni www.industry.fo. Aftaná miðjan september verður møguleiki hjá øðrum at tekna seg til Vinnudagin.
Vælumtókti Vinnudagurin er aftur hesaferð samansettur av spennandi fyrilestrum í Norðurlandahúsinum og einum døgurða á Hotel Føroyum.
Í ár hevur Vinnuhúsið valt at varpa ljós á evni nýskapan, menning og nýhugsan. Allir fyrilestrarnir snúgva seg sostatt á ein ella annan máta um hesi evni.
Íslendingurin Lárus Ásgeirsson er stovnari og sølustjóri á Marel Food Systems, sum er ein vælkend fyritøka í Føroyum. Hann fer at siga nøkur orð um, hvussu hugskotið til Marel var til, og frá gongdini frá byrjanini hjá fyritøkuni til nú at vera ein alheims fyritøka.
Liselotte Lyngsø er futurist og altjóða serfrøðingur innan nýskapan og framtíðargransking. Hon fer at hyggja eftir, hvussu tey góðu hugskotini verða ment við støði í framtíðar møguleikum. Liselotte Lyngsø hevur m.a. verið granskingarleiðari á Instituttet for Fremtidsforskning og er í dag partnari í Future Navigator, sum ráðgevur um framtíðargrundaða hugskotsmenning.
Heini Zachariassen fer at greiða frá væleydnaðu søguni um BullGuard frá byrjan til nú, hann tekur seg úr fyritøkuni. Heini er vælkendur í Føroyum, og varð fyrr í ár valdur til nevndarformann á Føroya Tele.
Hermann Oskarsson er umframt at vera kendur sum stjóri á Hagstovuni eisini kendur fyri sín hvassa penn, og á Vinnudegnum 2008 fer hann at seta upp eina ironiska spegilsmynd av okkum sjálvum.
Umframt hesar fýra fyrilestrarnar verða eisini Ársins Virki og Ársins Átak kosin.
