Nú ber til at síggja upptøkurnar frá valfundinum, sum Vinnuhúsið skipaði fyri í Klaksvík hóskvøldið 5. mars
Hóskvøldið 5. mars skipaði Vinnuhúsið fyri almennum valfundi í Klaksvík, har valevni fyri allar politisku flokkarnar luttóku í kjaki um tveir avgerandi spurningar fyri føroyska samfelagið: Hvussu vit tryggja kappingarførar vinnukarmar, og hvussu vit fáa ta arbeiðsmegi, sum samfelagið tørvar.
Á fundinum varð dentur lagdur á, at tað er vorðið alsamt truplari og dýrari at reka vinnuligt virksemi í Føroyum. Hækkingar í almennum gjøldum og avgjøldum, umsitingartung lóggáva og óvissa um framtíðar karmar leggja trýst á føroyskar fyritøkur og ávirka beinleiðis møguleikarnar fyri vøkstri, arbeiðsplássum og vælferð.
Samtíðis stendur føroyski arbeiðsmarknaðurin framman fyri stórum avbjóðingum. Við sera lágum arbeiðsloysi og høgum vinnutíttleika er tørvurin á arbeiðsmegi stórur á nærum øllum økjum. Á fundinum varð tí eisini kjakast um, hvønn leiklut útlendsk starvsfólk eiga at hava, hvussu fleiri ung og eldri kunnu gerast partur av arbeiðsmarknaðinum, og hvussu vit fáa fleiri føroyingar at velja Føroyar.
Fundurin vísti, at vinnukarmar og arbeiðsmegi hanga tætt saman. Uttan støðugar og kappingarførar karmar verður truplari at menna vinnuna, og uttan arbeiðsmegi verður menningin forðað. Tí eru hetta spurningar, sum hava stóran týdning fyri framtíðar menningina í Føroyum.
Áhugin fyri fundinum var góður, og áhoyrarar høvdu eisini møguleika at seta spurningar til valevnini. Orðstýrari var Rógvi Olavson.
Upptøkurnar frá valfundinum eru nú tøkar at síggja:
