Felagið Samskifti minnir fyritøkur og stovnar á at virða upphavsrætt og vørumerki, tá ið samskiftistilfar verður ment við vitlíki

Vitlíki er ein snildur hjálpari í gerandisdegnum. Men skipanirnar eru lærdar upp við stórum nøgdum av tilfari, og úrslitið er ikki altíð so upprunaligt, sum tað kann tykjast. Búmerki, slagorð, maskottar og annað tilfar kunnu tí liggja tætt at samleikum, sum onnur hava brúkt nógva tíð, orku og pengar upp á at menna.

Hetta kann gera seg inn á rættindi hjá øðrum og vera í stríð við góðan marknaðarføringssið. Reglurnar um upphavsrætt, vørumerki og vinnulig eyðkenni eru eisini viðkomandi, tá ið vitlíki er brúkt í arbeiðinum. At tilfarið er gjørt við vitlíki, frítekur ikki fyritøkuna frá ábyrgd.

Felagið Samskifti heitir tí á fyritøkur og stovnar um at kanna tilfarið væl, áðrenn tað verður tikið í nýtslu. 

Vitlíki kann gera arbeiðið lættari. Ábyrgdin fyri tí, vit senda út, er tó framvegis okkara.