Ung í 8. flokki í Tórshavnar kommunu fingu í farnu viku innlit í nógvu møguleikarnar at fara í læru og velja eitt handverksyrki, tá ið tiltakið Yrkisleiðin varð hildið á Reinsarínum

Í farnu viku savnaðust næmingar úr øllum 8. flokkum í Tórshavnar kommunu til tiltakið Yrkisleiðin, sum Havnar Handverksmeistarafelag skipaði fyri.

Tiltakið varð hildið á Reinsarínum og í hølunum rundanum, og endamálið var at vísa næmingunum, hvussu nógvir spennandi møguleikar liggja í at fara í læru og velja eitt handverksyrki.

Íblástur frá yrkislærdum
Á tiltakinum møttu næmingarnir handverkarum og øðrum yrkislærdum, sum greiddu frá um sína útbúgving og yrkisleið – og hvussu tey trívast í yrkinum.

Næmingarnir vórðu býttir í seks bólkar, har tvey og tvey yrkislærd tóku ímóti teimum í hvør sínum høli. Soleiðis fingu næmingarnir høvi at hoyra beinleiðis frá fólki, sum starvast í yrkinum til dagligt, og at seta spurningar um lærutíð, arbeiðspláss til framtíðarmøguleikar.

Ein trygg byrjan upp á arbeiðslívið
Ein handverkslæra er ein greið og kveikjandi leið inn í arbeiðslívið. Sum lærlingur fært tú:

• praktiskar royndir frá fyrsta degi
• undirvísing og vegleiðing frá royndum meistarum
• løn og arbeiðsrøkt, meðan tú lærir

Tá ið lærutíðin er liðug, hevur tú eina yrkisleið fyri framman við góðum møguleikum – bæði í Føroyum og uttanlands. Hetta var ein týðandi boðskapur til næmingarnar.

Stoltleiki og meining í arbeiðinum
Handverk er meira enn arbeiði við hondunum. Tað er at skapa nakað, sum sæst og hevur virði – hús, bygningar, umhvørvi og vørur, sum fólk nýta hvønn dag. Tað gevur stoltleika og meining og krevur bæði skapandi evni og tekniska fatan.

Tørvurin á dugnaligum fakfólki stórur og fer at vaksa komandi árini. Grøna orkuskiftið, bygging, umvælingar og endurnýtsla leggja upp til, at faklærd fara at hava nógv at gera langt fram í tíðina.

Tey, sum velja handverksleiðina, hava tí eitt arbeiðslív við tryggum grundarlagi og fjølbroyttum arbeiðsuppgávum. At velja eina handverksútbúgving er ikki ein endaligur vegur, men ein byrjan til eitt lív við møguleikum. 

Handverkarar eru eftirspurdir – í dag, í morgin og í framtíðini. Tey byggja, umvæla, skapa og bera ábyrgd fyri stórum pørtum av tí, sum samfelagið stendur á. 

Luttakarar á Yrkisleiðini vóru: