Vinnan hittist til samveru og íblástur á Vinnudegnum

Eina ferð um árið leggja fólk úr øllum krókum av føroyska vinnulívinum dagliga virksemið til viks. Tey seta kós móti Norðurlandahúsinum, har tey savnast til ein heilt serligan dag. Ein dag við áhugaverdum fyrilestrum, aktuellum evnum, íblástrí og góðari samveru.

Vinnudagurin er hátíðardagur vinnunnar. Her hittast fólk tvørtur um vinnugreinar og áhugamál, og her verður bæði hugsað frameftir og aftureftir. Tað er eisini dagurin, tá ið Ársins Virki og Vinnuátakið verða kosin, og nýggj hugskot og samstarv kanska verða fødd.

Men dagurin endar ikki, tá ið skráin í Norðurlandahúsinum er komin at enda. Tá flyta vit okkum til Gundadals og halda fram í góðum veitslulag í hølunum hjá Dansifrøi, sum verður umskapað og endavent til høvið.

Føroya Arbeiðsgevarafelag skipar fyri Vinnudegnum, og endaliga skráin verður almannakunngjørd í august. Tá letur tilmeldingin eisini upp.

Set kross í kalendaran 19. september, tí longu nú er vist, at skráin verður pakkað.