Føroyski arbeiðsmarknaðurin er skipaður við avtalum millum partarnar á arbeiðsmarknaðinum. Í hesi skipan hava partarnir á arbeiðsmarknaðinum ábyrgdina at samráðast um lønar- og setanarviðurskifti innan karmarnar, sum lóggávan setir fyri trætuloysnum og øðrum ósemjum millum partarnar. Hetta er tann sokallaða danska arbeiðsmarknaðarskipanin. (Vinnusjónarmið)
Føroya Arbeiðsgevarafelag heldur, at partarnir á arbeiðsmarknaðinum, tvs. arbeiðsgevari og arbeiðstakari, skulu avtala so nógv sum møguligt sínamillum. Soleiðis kunnu arbeiðsgevarin og arbeiðstakarin tryggja, at starvsviðurskiftini og viðurskiftini á arbeiðsplássinum hóska teimum best. Tað almenna skal tí bara tryggja grundleggjandi rættindi, sum hoyra einum nútíðarsamfelagi til og koma upp í leikin við løgskipandi tiltøkum, um partarnir á arbeiðsmarknaðinum ikki megna at loysa málið sínámillum.
Ein smidligur arbeiðsmarknaður
Tað er eitt eyðkenni fyri tann føroyska arbeiðsmarknaðin, at tað er lætt bæði at seta og siga upp starvsfólk. Í Føroyum hava vit tað neyðuga sosiala trygdarnetið og Arbeiðsloysisskipanina, sum tryggjar, at starvsfólk koma væl og trygt víðari, um tey ikki eru á arbeiðsmarknaðinum. Ein smidligur arbeiðsmarknaður merkir, at tað er lætt hjá arbeiðstakarum at skifta millum størv, samstundis sum arbeiðsgevarar hava góða og breiða atgongd til arbeiðsmegi. Hetta fer fram á einum arbeiðsmarknaði, sum annars er væl skipaður við avtalum og reglum. Ein smidligur arbeiðsmarknaður hevur avgerandi týdning fyri vinnulív og samfelagið annars.
